Ode tricolos tetrastrophos ad Thylesium Estrofa alcaica. Dos sistemas asclepiadeos Uxore, natis, fratribus, et solo exul relictis, frigida per loca Musarum alumnus, barbarorum ferre superbiam et insolentes  mores coactus, iam didici, invia per saxa, voces ingeminantia fletusque, sub rauco querelas murmure Danubii levare. O nate tristem sollicitudine lenire mentem et rebus atrociter urgentibus fulcire amici pectora docte manu, Thylesi, iam iam sonantem Delius admovet dexter tacentem barbiton antea: cantare Sebethi suädent ad vaga flumina cursitantes Nymphae; iam amatis moenibus inclitae non urbis, amnis quam Tagus aureo nodare nexu gestit, ultra me lacerat modum amor furentem. Sirenum amoena iam patria iuvat cultoque pulchra Parthenope solo iuxtaque manes considere vel potius cineres Maronis. Aegro deorum quis tulerit, rogas, herbis repostis auxilium potens, mentisque consternationem cantibus et fidibus levarit? Idem sonanti cui vaga flumina sistunt silentes margine vortices ventosque narratur frementes per nemora ardua conquiesse. Hic nam revinxit me tibi vinculo gratis Camoenae quod mihi nexibus texere, praelargus quid ultra me miserum potuit iuvare? Imbrem beatis nubibus aureum vivaque talum compede candidum nexam puellam coniungemque languidulis oculis querentem carmen canentis sic animum rapit mentemque, ut omnes subiaceant graves curae et labores, evolemque aliger his super elevatus. Te, mi Thylesi, te comite obtulit sese parentis quem veneror loco, cui dulce pignus nostri amoris non animum pigeat patere; arcana divum dum reserat, novus huic pectus alte sollicitat furor, curare seu mortalium res caelicolas grave sive monstrat  natos parentum crimina ob impia vexari, ut auras carpere dum licet, nec luxui ipsi indulgeant nec poena parentibus ulla desit. Haec aure cuncti praecipue imbibunt alte silentes, et Marius meus, rerumque multarum refertus atque memor Placitus bonarum. Honesta cunctos hinc domus accipit liberque sermo nascitur, haud tamen impune, nam, si tortuosis nexibus implicitum quid audes suadere, sperans ingeniosius quam verius nos pertrahere ad tuum sensum, statim aggressa est cohors te, ut Ciconum irruit in canentem. Num tu fluentem divitiis Tagum, num prata gyris uvida roscidis, mutare me insanum putabas dulcibus immemoremque amicis?